Շնորհավորանք՝ Գիտելիքի օրվա կապակցությամբ
Եղբայրնե՛ր և քույրե՛ր, սիրելի՛ հայեր, մեր սիրելի երեխանե՛ր,
Մեր գեղեցիկ երկիր Հայաստանը նշում է Գիտելիքի օրը: Մեկնարկել է նոր ուսումնական տարին: Սա սովորական օր չէ, սա ուսուցիչների և սովորողների կարևոր տոն է: Սա նոր փուլ է մեր երեխաների կյանքում, հատկապես նրանց, ովքեր առաջին անգամ են մտնում դպրոց։ Նրանք բռնում են գիտելիքի, ձեռքբերումների ու հաղթանակների ճանապարհը՝ հանուն մեր երկրի ապագայի, հանուն խաղաղության ու բարգավաճման:
Մեր երեխաները պետք է ժամանակակից տեխնոլոգիաներին և նոր հնարավորություններին հասանելիություն ունենան, որպեսզի ամենաժամանակակից մակարդակով գիտելիքներ ստանան և մեծացնեն իրենց ներուժը,ինչպես նաև տարիներ անց պրոֆեսիոնալ և գրագետ կառավարեն Հայաստանի Հանրապետությունը: Իսկ ուսման համար պատշաճ պայմանների ստեղծումը մեր պետության պարտականությունն է և անսասան պատասխանատվությունն ապագա սերունդների առջև։
Ուսուցիչները կարևոր դեր են խաղում ուսումնական գործընթացում: Նրանց գիտելիքներից, հմտությունից, անկեղծությունից, համբերատարությունից և երեխաների հանդեպ սիրուց է կախված ոչ միայն դպրոցական կյանքի որակը և հետաքրքրությունը ուսման նկատմամբ, այլև նրանցից է կախված յուրաքանչյուր աշակերտի, հետևաբար նաև մեր ողջ երկրի ապագան։
Ուսուցչի բարձր կոչումը նշանակում է, որ այս մարդը պարզապես դասագիրքը չի վերապատմում դասարանում։ Նա այն մարդն է, ով օժտված է իր հայրենիքի, իր մշակույթի, սովորույթների, քրիստոնեության և հնագույն պատմության հանդեպ սիրո և նվիրվածության ոգով երեխաներին դաստիարակելու վստահությամբ, որն անքակտելիորեն կապված է ժամանակակից կյանքի հետ: Նա այն մարդն է, ում վստահված է երեխաների մեջ պարտականության զգացում, ազնվություն և պարկեշտություն սերմանել, ցանկացած բարդ իրավիճակում ճիշտ որոշում կայացնելու ունակություն: Դրա համար երեխաներն ու ծնողները հույսով ու սիրով են նայում ուսուցիչներին։
Օգտվելով առիթից՝ ուզում եմ իմ անկեղծ շնորհակալությունը հայտնել իմ մանկավարժներին և դաստիարակներին կյանքի բոլոր փուլերում: Ձեր հոգատարությունը, ձեր գիտելիքները, ձեր իմաստուն խորհուրդները, լավագույնը կիսելու ձեր ցանկությունը թույլ տվեցին ինձ ամուր կանգնել և վստահորեն նայել առաջ: Խոնարհվում եմ Ձեր առջև, իմ սիրելի՛ ուսուցիչներ:
Այս լուսավոր տոնի առթիվ շնորհավորում եմ Հայաստանի հարգարժան գիտնականներին, ովքեր, հենվելով իրենց խորը գիտելիքների և հարուստ կենսափորձի վրա, պատրաստում են արժանի մանկավարժների բանակ, ինչպես նաև դասագրքերով ու ձեռնարկներով ապահովում երկրի կրթական համակարգը: Ձեր աշխատանքի որակից, հայրենիքի հանդեպ սիրուց, ձեր սկզբունքայնությունից ու ազնվությունից է կախված, թե մեր երիտասարդությունը ինչպես կմեծանա։
Սրտանց շնորհավորում եմ բոլոր մանկավարժներին, աշակերտներին և նրանց ծնողներին այս գեղեցիկ տոնի՝ Գիտելիքի օրվա կապակցությամբ: Մաղթում եմ հաջողություններ ուսման և աշխատանքի մեջ:
«Համահայկական ճակատ» շարժման առաջնորդ Արշակ Կարապետյան: